Aktualności

31.10.2015 Kaszëboma, co latos òdeszlë...

dodano dnia

Pùsto. Pusto w noc. Pùsto w dzéń. W całoscë pùsto. Za Wama...

Mòże tam, na nym, je lepi?  Mòże aniołë w baszkã grają a „Kaszëbską Królewą” na szesc głosów spiéwią...? A mòże jaką nôùkòwą sesjã prawie òdprôwiają? Jaczi temat? „Jakno w niebie, tak téż na zemi – próba ùdokaznieniô” abò „Chmùrniczi – niebò a zemia”...  Profesór Tréder rozpòwiôdô z Cénową. Profesór Samp kôrbi z Derdowsczim. Profesór Wnuk-Lëpińsczi cziwie głową a redachtór Pestka wëprôwôdzô Bómbã midzë blónë...

 


Nie bòjã sã

Nié. Nie bòjã sã smiercë!

Jô sã smiercë nie bòjã!

Nie zakrzëknã: Have mercy!

Ni móm dërżeniô kolan...

 


Nie mdã prosył, przeprôszôł

I prastitie nie rzeknã

Chùtczi Trudu sã spłoszã

Z mòstu wiżawë skòknã...

 


Młotkã dzesãc-kilowim

Dzes w ògnia kùzni blôskù

Przëgrzejã sobie w głowã

Nie zrobiã wiele trzôskù...

 


Nôtłëstszi białce we wsë

Na szëjã sadnąc kôżã

Co mie rôz-dwa zadëszi

Nim rãce w Amen złożã...

 


Przez lëpë hilfe żódno

Nie przeńdze, mòwë ni ma

 Ùpiarti jem, wiém, trudno,

Tec taczi mómë klimat...

 


Le żôl mie je nôblëższëch

Co òd mie zanôleżą.

Chto przëniesë jim dëtczi?

Chto zadbô, bë ba miło?

 


Chto òpału nawlecze

Na zëmné dnie, nocëska?

Chto kôże, żebë dzecë

Flot w wërë szłë sã wëspac?

 


Òdłożã tej na chwilã

Co trzeba do ùmrzeniô,

Bò niglë zamknã òczë

móm wiele do zrobieniô…

 


Tómk Fópka

Strona korzysta z plików cookies w celu realizacji usług i zgodnie z Polityką Plików Cookies.
Możesz określić warunki przechowywania lub dostępu do plików cookies w ustawieniach Twojej przeglądarki.